Yn y diwydiant sgrin, lle mae amserlenni prosiectau'n dynn a chreadigrwydd yn hanfodol, nid yw gosod nodau'n effeithiol yn ymarfer 'ticio'r blwch', mae'n adnodd hanfodol i feithrin cymhelliant a sbarduno cydweithio ymysg timau.  

Mae ymchwil yn cadarnhau bod gosod nodau yn un o'r ymyriadau sefydliadol mwyaf effeithiol, gan ei ddisgrifio fel 'meddygaeth cryfder presgripsiwn' ar gyfer perfformiad. Ond fel unrhyw feddyginiaeth gref, mae angen ei defnyddio'n gywir. Mae'n bwysig ein bod yn mynd y tu hwnt i ddull gweithredu sy'n addas i bawb ac yn sicrhau bod pobl yn glir ynghylch camau gweithredu (beth sydd angen ei wneud) a phwrpas (pam ei fod yn bwysig) wrth osod nodau. Pan fyddwch chi'n egluro'n union beth mae llwyddiant yn ei olygu ac yn helpu eich tîm i weld y darlun cyfan maen nhw'n cyfrannu ato, rydych chi'n rhyddhau cymhelliant, yn sbarduno ffocws creadigol, ac yn caniatáu i ddulliau cydweithio lifo. 

Mae rheolwyr yn aml yn defnyddio targedau penodol sy'n canolbwyntio ar ganlyniadau lle bynnag y bo modd. Mae'r rhain yn aml wedi'u labelu'n nodau 'CAMPUS' - Cyraeddadwy, Amserol, Mesuradwy, Penodol (ac eto'n ymestyn), Uchelgeisiol, a Synhwyrol.  

Ar gyfer gwaith arferol, mae modd ei ragweld, mae nodau canlyniadau penodol a heriol yn gweithio'n dda. Maent yn cynyddu ffocws, cymhelliant ac yn arwain at ganlyniadau cryf. Ond mae ymchwil yn dangos nad yw dull hollgynhwysfawr yn effeithiol: dylai'r math o nod gyfateb i natur y dasg. Gall defnyddio'r nod anghywir gyda'r dasg anghywir achosi perfformiad salach drwy dynnu sylw oddi wrth yr hyn sy'n wirioneddol bwysig. 

Ar gyfer tasgau cymhleth neu annisgwyl - lle mae pobl yn dysgu sgiliau newydd, yn datrys problemau cymhleth, neu angen gweithio drwy wahanol gamau o dasgau cysylltiedig - nid nodau canlyniad penodol a heriol yw'r rhai gorau. Mae nodau dysgu neu ymddygiad yn fwy effeithiol. Mae'r rhain yn tynnu sylw pobl at brosesau a dulliau gwaith - sut maen nhw'n cyflawni eu nodau. Er enghraifft, gallai datblygu sgiliau penodol wrth i rywun gwblhau prosiect neu ddilyn prosesau gwaith tîm sefydledig fod yn nod. Wrth gwrs, mae llawer o swyddi creadigol yn gymhleth yn hytrach nag yn arferol, ond gall y dull hwn fod yn groes i reddf i rai rheolwyr, oherwydd mae nodau dysgu ac ymddygiad yn aml yn fwy goddrychol ac yn anoddach eu hasesu na nodau canlyniadau. Ond mae'n bwysig deall y bydd perfformiad yn llawer mwy na phwysleisio canlyniadau ar gyfer tasgau, ymddygiad neu nodau dysgu cymhleth. 

Yn ogystal â sicrhau bod eich tîm yn glir ynghylch beth sydd angen ei wneud a sut i gyflawni hyn, mae'n bwysig rhannu'r 'pam', gan greu ymdeimlad cyffredin o genhadaeth. Mae ymchwil yn awgrymu bod ymrwymiad i nodau yn ganolog i gymell aelodau'r tîm a gwella perfformiad. 

Mewn amgylchedd prysur fel y diwydiant sgrin, bydd egluro rôl yr amcan wrth gyflawni'r darlun ehangach yn sicrhau bod pobl yn mynd o ystyried eu tasg fel eitem unigol i gyfraniad canolog at y llwyddiant terfynol. Bydd y weledigaeth gyffredin hon yn caniatáu i brosesau cydweithio lifo'n naturiol, sy'n aml yn gallu bod yn anodd ei gyflawni mewn amgylcheddau gwaith sy'n seiliedig ar brosiectau. 

Er mwyn bod yn glir am y dasg a'i phwrpas, mae angen strategaeth o hyd ar gyfer sut mae hyn yn cael ei gyflawni'n ymarferol. I sicrhau bod eich tîm yn gallu cyflawni ei nodau penodol, canolbwyntiwch ar y camau hyn sy'n seiliedig ar dystiolaeth: 

• Diffinio nodau gweithredu: Anogwch bobl i fynd ymhellach na dim ond datgan eu nod. Mae'n bwysig diffinio manylion (sut, ble a phryd) yr hyn y byddant yn ei wneud i gyflawni eu hamcan. Mae ymchwil wedi dangos bod y dull hwn yn gwella ein tebygolrwydd o gyflawni nodau. Er enghraifft, gallai golygydd cynorthwyol sy'n bwriadu camu ymlaen i fod yn olygydd ar gyfres olaf rhaglen deledu osod nod gweithredu fel gofyn am gael torri un olygfa ar y cynhyrchiad presennol. Mae gan y nod hwn amserlen, mae'n benodol, ac mae'n dangos yn glir ei fod yn barod i symud ymlaen yn ei yrfa. 

• Cyfathrebu'n barhaus: Mae gosod nodau'n effeithiol yn dibynnu ar fonitro cynnydd a rhoi adborth amserol. Mae cyfarfodydd rheolaidd yn darparu cymorth, yn cael gwared ar rwystrau ac yn galluogi timau i addasu, yn enwedig yn amgylchedd y diwydiant sgrin sy'n symud yn gyflym. 

Mae gosod nodau yn arf pwerus, ond dylid mynd i'r afael ag ef yn ofalus. Byddwch yn glir ynghylch sut beth yw llwyddiant, gan gyfateb y nod i gymhlethdod y gwaith. Rhannwch y darlun cyfan, gan egluro pwrpas pob nod. Pan fydd gan bobl nodau clir a phwrpasol, bydd eu cymhelliant a'u cydweithrediad yn cynyddu, gan eu galluogi i lwyddo.