I reolwyr cynhyrchu, mae datblygu staff yn adnodd pwysig ar gyfer datblygu tîm medrus, ymrwymedig a hyblyg i sbarduno creadigrwydd a chyflwyno prosiectau o ansawdd uchel ar amser ac o fewn y gyllideb. Er y gall datblygu staff olygu buddsoddi mewn hyfforddiant sgiliau, mae hyfforddi yn y gweithle yn ddull amgen o'ch cefnogi a'ch datblygu chi a'ch tîm.  

Mae hyfforddiant yn y gweithle yn broses ddatblygiadol sydd wedi'i chynllunio i helpu staff i wella eu perfformiad, eu sgiliau, eu gwybodaeth a chyflawni eu nodau proffesiynol. Gwneir hyn drwy ddeialog gydweithredol, ddwy ffordd rhwng hyfforddwr a'r sawl sy'n cael ei hyfforddi, gan ganolbwyntio ar ddatgloi potensial yn hytrach na dim ond trosglwyddo gwybodaeth. Y prif nod yw gwella gallu ac effeithiolrwydd aelodau staff yn eu rôl bresennol neu eu paratoi ar gyfer cyfrifoldebau yn y dyfodol. Mae’r dull hwn yn cynnig manteision penodol i ddiwydiannau creadigol gan fod hyfforddi hefyd yn cefnogi pobl i ddod o hyd i'w safbwynt a'u sgiliau unigryw, ac i feddwl yn greadigol am sut i fynd i'r afael â thasgau.

Yn ogystal â bod o fudd i staff sy'n cael hyfforddiant, mae tystiolaeth yn dangos bod hyfforddiant yn arwain at fanteision ehangach i fusnesau.  

• Mae gwerthusiadau o ymyriadau hyfforddi wedi canfod bod hyfforddi'n gwella perthnasoedd, gwaith tîm a chynhyrchiant.  
   

• Gall hyfforddi hefyd gefnogi iechyd meddwl mewn amgylchedd gwaith prysur, gwella lles, lleihau lefelau gorweithio a chaniatáu i hyfforddwyr feddwl yn glir a delio â phroblemau annisgwyl a gofynion cynyddol.  
   

• Mae cysylltiad hefyd rhwng hyfforddi a'r manteision a ddaw yn ei sgil â lefelau uwch o ran cadw staff. Gallai hyn fod o fudd arbennig yn niwydiant ffilm y DU lle mae 63% o weithwyr yn dweud bod gwaith wedi cael effaith negyddol ar eu hiechyd meddwl ac mae 64% wedi meddwl am adael. Felly, er y gallai buddsoddi mewn hyfforddi arwain at gost ymlaen llaw, mae’n cynnig manteision clir i fusnesau, gydag un astudiaeth yn nodi bod ymyriadau hyfforddi yn achosi 5.7 gwaith yn fwy o elw ar fuddsoddiad.  

Gallwch roi hyfforddiant ar waith ar gyfer eich tîm gan ddefnyddio'r adnoddau sydd gennych eisoes yn fewnol. Er bod cyflwyno hyfforddwyr allanol yn gallu bod yn fuddiol, mae arfogi eich arweinwyr a'ch rheolwyr eich hun â sgiliau hyfforddi yn newid hyfforddiant o ymyriad allanol prin i arfer rheoli bob dydd sydd o fudd i bawb. Mae gwahanol ffyrdd o wneud hyn: 

• hyfforddwyr sy'n rheolwyr - rheolwyr yn hyfforddi eu his-weithwyr uniongyrchol, fel arfer gan ganolbwyntio ar gyflawni nodau gwaith a gofynion busnes. Dyma’r math mwyaf cyffredin o hyfforddi. ,  

• hyfforddwyr mewnol - cydweithwyr sydd y tu allan i linell reoli uniongyrchol rhywun, gan ddarparu rhaglen barhaus o ymyriadau datblygu un-i-un, neu 

• hyfforddi bob dydd - dull lle mae holl reolwyr/aelodau'r sefydliad yn dysgu sgiliau hyfforddi allweddol i'w defnyddio yn eu gwaith bob dydd.  

Gallwch hefyd ddefnyddio gwahanol ddulliau o ymdrin â nodau a lefelau ymgysylltu drwy hyfforddi, sydd fel arfer yn un o dri math o ddull hyfforddi:  

• Hyfforddi sgiliau: Cyfnod byr, sy'n canolbwyntio ar ymddygiadau penodol. 

• Hyfforddi perfformiad: Canolbwyntio ar helpu staff i osod nodau, goresgyn rhwystrau, a monitro perfformiad. 

• Hyfforddi datblygiadol: Dull ehangach, mwy cyfannol, sy'n delio â chwestiynau personol a phroffesiynol. 

Pa bynnag ddull rydych chi'n ei ddefnyddio, dylai’r hyfforddiant gael pwrpas clir o ran pam ei fod yn cael ei ddefnyddio yn eich cyd-destun chi, a dylai fod modd mesur ei effaith a gallu ei olrhain i sicrhau ei fod yn effeithiol.   

Bydd gwreiddio hyfforddi yn eich busnes yn gofyn am ddatblygu sgiliau hyfforddi allweddol ymysg rheolwyr a/neu eich tîm ehangach. Er y bydd datblygu'r sgiliau hyn yn debygol o olygu mwy na dim ond darllen y blog hwn, mae'n debyg eich bod eisoes yn meddu ar sgiliau hyfforddi ac yn eu defnyddio yn eich bywyd bob dydd a'ch bywyd gwaith. 
  

Un dull allweddol o hyfforddi yw symud i ffwrdd o ateb cwestiynau aelod o staff yn uniongyrchol neu roi set o gamau gweithredu iddo eu dilyn pan fydd yn dod atoch gyda phroblem, a thuag at ei helpu i ddatrys ei broblemau ei hun. Er y gallai hyn gymryd mwy o amser ar hyn o bryd, bydd yn eu helpu i ddatblygu eu sgiliau a'u gwybodaeth eu hunain, gan ganiatáu iddynt fagu hyder a gallu, fel na fydd angen iddynt ofyn i chi y tro nesaf y byddant yn dod ar draws y mater. Gellir defnyddio ychydig o sgiliau allweddol i hyfforddi fel hyn:  

• Gofyn cwestiynau penagored - sut, beth a pham y gall cwestiynau helpu pobl i ystyried eu problemau, a rhoi mwy o fanylion i chi am y sefyllfa  
   

• Gwrando’n astud - yn aml, bydd yr atebion sydd eu hangen arnynt gan bobl yn barod. Drwy fod yn bresennol a dangos iddynt eich bod chi'n gwrando, gallwch eu cefnogi i weithio drwy'r broblem a dod o hyd i ateb. Efallai y byddwch chi'n ceisio ailadrodd yr hyn maen nhw wedi'i ddweud wrthych chi (e.e. dweud “Dwi'n clywed dy fod di...” neu “Ydw i'n iawn dy fod di’n golygu...”) er mwyn ysgogi trafodaeth bellach a dangos eich bod yn deall.  
   

• Helpwch nhw i ystyried yr opsiynau a'r dewisiadau eraill - yn hytrach na dweud wrth rywun beth fyddech chi'n ei wneud mewn sefyllfa, gofynnwch iddyn nhw beth yw'r opsiynau, ac yna ewch gam ymhellach a'u hannog i feddwl am opsiynau eraill. Gall hyn fod yn arbennig o fuddiol wrth wneud penderfyniadau creadigol.  
   

• Gorffen gyda gweithred - ar ôl siarad, gwrando a meddwl am yr opsiynau posibl, gweithiwch gyda staff i benderfynu beth fyddan nhw'n ei wneud nesaf.  

Efallai na fydd y dull hwn bob amser yn briodol (er enghraifft pan fyddwch yn wynebu amserlen dynn, neu pan nad oes gan rywun y sgiliau na'r wybodaeth i gwblhau tasg). Fodd bynnag, mae'n debygol y gwelwch fod llawer o gyfleoedd i staff hyfforddi ei gilydd yn y gwaith, gan arwain at fwy o hyder, creadigrwydd a gwybodaeth ymysg eich tîm.