Y pwynt mwyaf hanfodol yw talu'n deg. Nid yw'n llafur am ddim - mae hwnnw'n hen syniad bellach. Mae'r rheini sy'n gweithio drwy'r dydd, yn cyfrannu at gefnogi eich busnes, yn haeddu cyflog teg. Ond y tu hwnt i'r ddadl foesol syml hon, mae talu am bob cyfle profiad gwaith yn eich galluogi i gael gafael ar yr unigolion mwyaf galluog ac angerddol sydd eisiau ychwanegu gwerth a gwneud gwaith gwych i'ch busnes, nid dim ond y rhai sy'n ddigon ffodus i beidio â chael biliau i boeni amdanynt. Ac mae hynny'n golygu talu cyflog priodol, nid dim ond ar gyfer treuliau - er y bydd cymorth gyda chostau teithio a/neu adleoli dros dro yn sicrhau bod y cyfle ar gael i bawb. 

Ystyriwch hefyd sut rydych chi'n recriwtio unigolion ar gyfer profiad gwaith. Mae'n gwbl annheg na all rhai pobl brofi eu hunain am nad ydynt yn ddigon ffodus i adnabod y bobl iawn yn barod. Mae camu y tu hwnt i gysylltiadau personol yn golygu eich bod yn gallu cael gafael ar yr unigolion mwyaf ymroddedig a thalentog â phosibl i helpu eich busnes i ffynnu. 

Y cam cyntaf bob amser yw eistedd gyda nhw ar eu diwrnod cyntaf - neu cyn iddynt ddechrau yn ddelfrydol - a chytuno ar rai o'r pethau y byddant yn eu gwneud yn ystod eu profiad gwaith. Efallai fod ganddyn nhw wybodaeth gadarn am eich busnes a'r sector sgrin yn barod, ond efallai y bydd angen arweiniad arnyn nhw hefyd ynghylch beth mae gwahanol aelodau o'r tîm yn ei wneud a sut gallai hyn gyd-fynd â'u nodau gyrfa. Cofiwch, nid gwas bach cyffredinol yw'r unigolyn ar brofiad gwaith. Rhowch dasgau ystyrlon iddyn nhw a fydd yn eu helpu i ddatblygu ac yn dangos y gorau o'n diwydiant iddyn nhw. Canolbwyntiwch ar y tasgau yr oedd yr unigolyn eisiau eu gwneud pan ddaeth atoch chi am y cyfle. 

Mae natur benodol profiad gwaith ystyrlon yn amrywio - mae'n dibynnu ar beth mae'r busnes yn ei wneud, pa mor fawr ydyw, ac yn hollbwysig, beth mae'r unigolyn ei eisiau. Ond mae nifer o bethau y dylech eu hystyried: 

• Darparu arweiniad a goruchwyliaeth ddigonol. Peidiwch â'u gadael i fwrw ymlaen â'r gwaith ar eu pen eu hunain. Cynigiwch help iddyn nhw ac atebwch gwestiynau pan fydd angen hynny arnyn nhw. A rhowch adborth iawn iddyn nhw fel eu bod yn gwybod sut i wneud yn well y tro nesaf.  
   

• Eglurwch beth mae tasg yn ei olygu. Cofiwch efallai na fydd unigolion llai profiadol yn gyfarwydd â phrosesau penodol neu jargon y diwydiant y mae eich cydweithwyr yn eu cymryd yn ganiataol. Mae hefyd yn helpu os ydyn nhw'n gallu deall pam mae angen gwneud tasg benodol a sut mae'n cyd-fynd ag amcanion ehangach y prosiect neu'r busnes. 
   

• Rhowch gyfleoedd i gyfarfod a gweithio gyda phobl wahanol. Maen nhw'n gallu deall mwy am y busnes drwy weld beth mae pobl eraill ac adrannau gwahanol yn ei wneud. Efallai y byddan nhw'n dysgu am rywbeth sy'n addas iawn iddyn nhw. 
   

• Cadwch olwg yn gyson. Gall cyfarfod rheolaidd â rheolwr neu bwynt cyswllt priodol eich helpu i ddeall sut mae'n mynd, beth arall yr hoffai ei wneud, ac unrhyw gymorth ychwanegol y gallai fod ei angen arno. 
   

• Mynediad at ‘gyfaill’. Mae cael 'cyfaill' dynodedig yn eu helpu i ymgartrefu a deall beth maen nhw'n ei wneud. Gallant gael help a mynd atynt gyda chwestiynau. Ystyriwch pwy allai fod y cyfaill mwyaf priodol - mae rhywun brwdfrydig ac agos-atoch, sy'n debyg o ran oedran, yn swnio'n berffaith! 
   

• Cynigiwch brofiad gwirioneddol gynhwysol. Mae hynny'n golygu hyblygrwydd lle bo'n bosibl o ran hyd lleoliad profiad gwaith ac oriau gwaith, er enghraifft i gyd-fynd â gofal plant neu astudio. A gwnewch yn siŵr eich bod yn cadw at oriau gwaith rhesymol, fel y cytunwyd ymlaen llaw. 
   

• Mae agwedd gyfeillgar a chroesawgar yn fuddiol iawn i’w helpu i ymgartrefu a manteisio i'r eithaf ar y cyfle. Cymerwch amser i egluro beth rydych chi'n ei wneud a pham. A gall rhywbeth fel trefnu cinio gyda chydweithwyr fod yn ffordd wych o'u croesawu i'r tîm! 

Os nad yw dechrau gyrfa rhywun brwdfrydig yn ddigon o gymhelliant, cofiwch ei fod yn wych i fusnes hefyd. Nid yn unig y gall gynnig pâr ychwanegol o ddwylo y mae mawr eu hangen i aelodau prysur o staff, ond gall recriwtiaid newydd hefyd gynnig syniadau a safbwyntiau newydd. Efallai y bydd staff presennol yn mwynhau'r cyfle i hyfforddi a bod yn rheolwr llinell ar rywun newydd. Efallai y byddwch hefyd yn dod o hyd i'r ymgeisydd perffaith ar gyfer rôl fwy parhaol yn eich tîm! Pan fydd profiad gwaith yn cael ei wneud yn dda, mae pawb yn elwa.