Efallai bod dweud 'Gwaith Da!' yn teimlo'n braf, ac yn well byth i'w glywed, ond i lawer o bobl, dyma'r adborth mwyaf maen nhw'n ei gael o ddydd i ddydd. Mae'n cynnig eiliad o gydnabyddiaeth, ond nid yw'n cynnig y ddealltwriaeth sydd ei hangen i dyfu, gwella na theimlo eu bod yn cael eu gwerthfawrogi go iawn. Gall rhoi a derbyn adborth penodol ac ystyrlon deimlo'n frawychus, ond mae'n sgil y gellir ei dysgu, ei hymarfer a'i chryfhau. 

Pan fydd adborth da yn cael ei roi, gall fod yn drawsnewidiol i bobl a sefydliadau. Yn hytrach na rhoi adborth ar hyd y ffordd ac aros am yr adolygiad blynyddol, mae deialog agored, rheolaidd, yn rhoi cyfle i weithwyr 'adolygu a golygu' eu hymddygiad ar y pryd. Mae adborth effeithiol yn cadw nodau mewn cof a'r camerâu'n troi, gan sicrhau bod pob penderfyniad creadigol yn cyd-fynd â'r stori rydyn ni eisiau ei hadrodd. 

Mae'n hawdd i adborth deimlo fel cosb, gan sbarduno ofn a mynd yn amddiffynnol. Ond drwy ei gyflwyno gyda gofal ac empathi, a chanolbwyntio ar y pethau cadarnhaol yn ogystal â'r pethau negyddol, mae adborth yn dod yn broses gefnogol. I'r rhan fwyaf ohonom, mae hyn yn golygu ail-fframio ein meddylfryd: nid yw adborth yn ymwneud â thynnu sylw at ddiffygion neu ganfod bai pan fydd rhywbeth yn mynd o'i le, mae'n ymwneud â meithrin potensial a datgloi creadigrwydd. Nid yw gwreiddio diwylliant adborth yn digwydd ar unwaith, mae’n broses o gymhwyso ychydig o egwyddorion yn gyson, nes byddwch yn symud i'r cyfeiriad iawn.     

• Mae adborth i bawb - dylai lifo i fyny i benaethiaid, yn ogystal ag i lawr. Creu cyfleoedd ffurfiol ac anffurfiol i weithwyr roi mwy o adborth.  

• Bod yn berchen ar eich datblygiad eich hun - grymuso aelodau'r tîm i fynd ati'n rhagweithiol i ofyn am adborth a rhannu syniadau ystyrlon ag eraill. 

• Arwain drwy esiampl - dylai rheolwyr ac arweinwyr fodelu'r ymddygiadau maen nhw'n disgwyl eu gweld. Chi sy'n gosod y patrwm y bydd pobl eraill yn ei ddilyn.  

• Ymgorffori adborth - ei gynnwys mewn prosesau o ddydd i ddydd, gan ganolbwyntio ar sicrhau ei fod yn dod yn ymarfer rheolaidd ystyrlon, nid ymarfer ticio blychau achlysurol.  

• Annog pobl i gymryd rhan - gofynnwch am adborth am unrhyw ddulliau newydd, peidiwch â'u datblygu ar eu pen eu hunain. Mae angen i chi ddeall beth sy'n gweithio a beth sydd angen ei olygu.  

I roi adborth sy'n cael effaith, gallwch fireinio eich sgiliau drwy ddilyn ychydig o strategaethau syml:   

• Gweithredwch yn gyflym - gall adborth fod ar ei orau tra bod y profiad yn dal yn ffres, nid wythnosau neu fisoedd yn ddiweddarach. Defnyddiwch eich sgyrsiau rheolaidd i agor y ddeialog. Ond os bydd rhywbeth pwysig yn codi, peidiwch â bod ofn trefnu cyfarfod penodol, mae'n dangos bod yr adborth yn bwysig. 

• Canolbwyntiwch ar ffactorau y gall yr unigolyn eu rheoli, meddyliwch am ymddygiadau, nid nodweddion. Ni ddylai adborth deimlo fel ymosodiad ar gymeriad rhywun.  

Er enghraifft: yn hytrach na thynnu sylw at nodwedd personoliaeth, disgrifiwch yr ymddygiadau rydych chi'n sylwi arnynt. Trowch 'mae angen i ti fod yn fwy carismatig' yn 'Roeddet ti ar dy liniadur yn y cyfarfod a doeddet ti ddim wir yn cyfrannu at y drafodaeth. Beth fyddai’n ddelfrydol yw...’ 

• Byddwch yn benodol a defnyddiwch enghreifftiau. Canolbwyntiwch ar yr hyn a ddigwyddodd, yr effaith, a ffyrdd o wneud pethau'n wahanol yn y dyfodol.  

Er enghraifft: 'Fe wnes i sylwi dy fod ar dy liniadur yn y cyfarfod ac na wnes di gyfrannu, a allai gael ymddangos fel nad oedd gen ti ddiddordeb. Y tro nesaf byddai’n syniad da i ti gadw'r gliniadur a chanolbwyntio ar y sgwrs.    

• Hyd yn oed yn well na dweud yn uniongyrchol wrth rywun beth i'w wneud yn wahanol, dylech ei annog i hunanfyfyrio. I wneud hyn heb orlethu pobl, gallwch ddefnyddio rhai awgrymiadau syml ar ddiwedd tasg neu gyfarfod: 

• Beth sydd wedi gweithio’n dda? Mae hyn yn annog pobl i gydnabod llwyddiannau a chryfderau. 

• Beth fyddai’n syniad da ei newid y tro nesaf? Mae hyn yn nodi un maes gwella ar gyfer camau nesaf clir. 

• Oes angen help arnat i gyflawni hynny? Mae hyn yn creu amgylchedd i rywun ffynnu. 

• Cysylltwch adborth â nodau cyffredin a chreu llinell glir i'r darlun ehangach. Rydyn ni i gyd yma i greu gwaith o ansawdd uchel i wasanaethu ein cynulleidfa. Gall atgyfnerthu sut mae pob unigolyn yn chwarae rhan bwysig wrth gyflawni'r nodau hyn fod yn ysgogiad