Canfu arolwg yn 2024 gan yr Elusen Ffilm a Theleduⁱ 

• fod 35% o weithwyr yn y diwydiant yn dioddef o iechyd meddwl gwael (canran uwch nag mewn diwydiannau eraill). 
   

• Dywedodd 63% o weithwyr fod hyn yn cael effaith negyddol ar eu hiechyd meddwl, ac mae 64% wedi ystyried gadael y diwydiant 
   

• Dim ond 12% sy'n credu bod y diwydiannau sgrin yn lle iach yn feddyliol i weithio ynddynt. 

Un ffactor canolog yw llwythi gwaith a sut y cânt eu rheoli. 

• Disgwyliadau a gofynion uchel a'r gred y dylai gweithwyr allu cynhyrchu llawer iawn o waith yn gyflym.  

• Mae gofynion cystadleuol yn ychwanegu at straen, gyda gweithwyr yn jyglo llawer o dasgau, yn aml heb lawer o gefnogaeth. Gallai ychwanegu tasg arall droi'r fantol yn iechyd meddwl gwael.  

• Mae galw uchel yn golygu oriau rhy hir, ychydig iawn o egwyliau, a theithiau hir weithiau.  

• Mae'n anodd bod ar eich gorau a sicrhau canlyniadau pan nad oes llawer o adborth prydlon, os o gwbl. Gall gorfod cynhyrchu nifer o allbynnau o fewn amserlenni tynn fod yn flinedig.  

• Mae natur ‘gormod neu ddim digon’ y byd cynhyrchu yn creu teimladau o ansicrwydd swydd a phryder ariannol sy'n golygu bod gweithwyr yn ymgymryd â nifer o brosiectau, fel bod ganddynt incwm y gallant fyw arno.  

Os nad yw llwythi gwaith yn cael eu rheoli, mae'r canlyniadau i'r diwydiant yn peri pryder, gan gynnwys: 

• Cynnydd mewn cyflyrau iechyd fel blinder, cwsg aflonydd, mwy o gamddefnyddio sylweddau, gorbryder, iselder a chwythu plwc. 

• Gwaith o ansawdd gwael oherwydd llai o gymhelliant, ymgysylltu a thorri corneli i gyflawni tasgau.  

• Pryderon recriwtio a chadw ar gyfer y diwydiant yn y tymor hir. 

Mae sgiliau da wrth reoli pobl yn hollbwysig. 

• Nid yw hyn mor hawdd ag y mae'n swnio, ac fel y gallai llawer o bobl dystio, gall hyn fod yn anodd iawn yn ymarferol oherwydd y tensiynau cynhenid yn y diwydiant a'r angen cyson i wneud mwy am lai. Ond dyna pam mae trafodaethau agored rhwng rheolwyr cynhyrchu a staff yn allweddol. 

• Neilltuwch amser penodol mewn prosiectau i holi pobl yn iawn. Nid sgwrs arwynebol yw hon, holi 'sut ydych chi?' i fod yn gwrtais, ond sgwrs go iawn am les corfforol a meddyliol unigolyn, a thrafodaeth am lwyth gwaith.  

• Mae'n golygu holi a gwneud yn siŵr bod y gwaith dan reolaeth, neu a oes pryderon ynghylch bodloni terfynau amser. Holwch gwestiynau fel: Beth sydd ar eich plât ar hyn o bryd? Ydych chi'n teimlo bod gennych ormod o dasgau? Sut gallwn ni wneud lle ar gyfer tasg frys? 

• Dylech ystyried dyrannu gwaith. Os oes rhywun eisoes yn gweithio ar nifer o dasgau, os ydych chi'n rhoi rhywbeth ychwanegol iddyn nhw, beth y gellir ei gymryd oddi arnyn nhw? Er enghraifft, os rhoddir tasg greadigol i weithiwr ei chwblhau, a oes modd dirprwyo gwaith gweinyddu prosiect yn rhywle arall er mwyn iddo allu canolbwyntio ar y brif dasg dan sylw? 

• Galluogi cyfathrebu agored fel bod gweithwyr yn teimlo'n ddigon cyfforddus i drafod pwysau llwyth gwaith heb boeni am ôl-effeithiau. Po fwyaf y bydd y sgyrsiau hyn yn digwydd, yr hawsaf fydd hi i'w cynnal. 

• Defnyddio dull sy'n seiliedig ar atebion. A oes modd rhannu tasgau'n dasgau bach y gellir eu rheoli? A all tîm ehangach gyflawni tasgau? Beth yw'r brif flaenoriaeth a beth all aros? 

Drwy flaenoriaethu’r broses o reoli llwyth gwaith, bydd rheolwyr cynhyrchu yn sicrhau gwell canlyniadau a lles gweithwyr, sefyllfa lle mae pawb ar ei ennill.